L'EUROPE ÈT LÈS DRWÈTS DO LINGADJE : i va falu r’trossî nos mantches, è 2004 !

L' « Union européenne » va crèche on fèl côp è 2004. Eyèt, dins l’min.me timp, ci sèrèt li momint dès votâdjes po l’Europe. Mins on n’a co pont d’ner di rèsponse au problème dès lingadjes, on l’a catchî pa-d’zo on faus « multilinguisme » qui c’èst tot djusse amantchi po lès trwès pus fwârts lingadjes. A caûse di ça, nos risquans d’énn’n’aller, à l’fin dès fins, viè li povwèr d’on seûl lingadje, ci qui sèreut fwârt damadje po totes les ritches difèrinces di lingadjes èt di cultures di l’Europe. C’èst po çola, notamint, qui lès èspérantisses disfindenut li principe d’on « lingadje-pont » po tortos ( è nin on seûl lingadje, atincion !), neûte, qui rèspèctéyereut tos lès lingadjes do l’min.me maniére èt qui f’reut mia vikî li démocraciye èn’Europe.

C'èst dins ç’t’idéye-là qu’on grand raploû si mèt su pîd, au ré di tote l’Europe, po l’démocraciye dès lingadjes. A prume, lès djins qui sont s’t’à l’tièsse do raploû volenut awè dès causadjes, li pus laudjes qu’on pout (par ègzimpe avou li côp d’win dès gazètes, do posse èt do l’ télé) rapôrt à comint ç’qui lès lingadjes si présintenut èmon nos’ôtes, Européyins, èt po qui lès djins si rind’nuche compte do problème. Eyèt, quékefiye,  si tot va bin, po fé boudji lès politicyins. Po z’i parvènu, i faut ièsse à bramint, èt qui l’raploû fuche « caflori », po awè d’l’èfèt. C’èst lès èspérantisses qu’ont yeu l’idéye do raploû. Et totes lès soces d’èspéranto èn’Europe bouteront à r’laye po fé conèche di qwè ç’qu’i r’toûne, dins leû réjion o bin leû payi.

Li raploû si lome EUROPA BUNTO, qu’on pôreut dîre, è walon, "Cafloriye Europe". Li nom vout fait veuy li costè d’fièsse do raploû, di totes lès coleûrs po ç’qui s’rapwate aus lingadjes.

Li raploû rachonerèt :

• totes lès soces d’èspérantisses d’Europe ;
• totes lès soces qui disfindenut o mètenut à l’oneûr dès lingadjes èt dès cultures, tot rèspèctant tos l’z’ôtes ;
• èt totes lès djins qui conèchenut comint ç’qui ça s’présinte dins l’Europe et qui sont pwartés po cit’afaire-là.

Li place : Strasbourg (France), asto do l’Européyin Parlèmint èt do Consèy di l'Europe

Li djou : li dimègne nouf (9) do mwès d’méy deus miles quate (2004) – qui c’èst li "Djournéye di l'Europe"

Comint : On scrît dins li langadje qu’on vout su lès baniéres. Et tot ç’qu’i vos plaît tint qu’on rèspèctéye lès Drwèts d’l’Ome èt do Citoyin d'Europe

Po tot sawè : i gn’arèt one “conférince di prèsse” qui chaque dès lingadjes i aurèt s’place. On z’i troverèt dès djins po r’mète çu qu’on dit dins tos lès lingadjes qui sèront riprésintès

QWÈ Ç'QU'ON POUT TROVER DISSU L'SITE INTERNET ?

Prezento : présintâdje do raploû èt do site dins sakants européyins lingadjes

Partneraj asocioj : Lès djins ( èt lès soces) qui pudenut leû paûrt dins l’amantchure do raploû, li lisse avou l’z ‘adrèsses di leû site, si i gn’a onke

Kunveturado : Po nn’aller à sakants èchones èn’auto à Strasbourg, li lisse dès djins qui volenut bin prinde dès ôtès djins avou zèls o bin dès cés qui, do contrére, dimandenut si gn’a pont d’place por zèls dins l’auto

Sloganoj & materialo : Lès baniéres èt ci qu’on scrit d’su : one lisse d’idéyes

Dissendolisto : Li prumî lingadje, tot d’au lon do raploû, ci sèrèt l’èspéranto, d’ofice. Mins on pout r’cîre one lisse dès forbatadjes, di europa-2004-subscribe@yahoogroupes.fr

Kontakto : Po z’è sawè d’pus, tot d’mandant qwè èt come aus cènes èt aus cés qui mwin.nenut l’atèléye ("organizantoj"), o bin au sècrétére ("sekretario") di l’arindjemint do raploû, èt co po tot ç’qu’on saye di conèche ("TTT-estro")

Ligoj : Lès loyins : sakants loyins avou l’Europe èt lès lingadjes

(tradukis ŭalonen de la Naumur-regiono: Arnold Hauwaert, el la asocio "Vivre en Walonie")