L’EUROPE ET L’DROT DES LANGUES. I’ faut faire en’ séquo in 2004 !

In 2004, l’Uniëon Européenne al’ va s’agrindir, et i’ ara aussi des électiëons européennes. Mais pindint ch’ timps là el’ problème des langues i’ est toudi pont arringii, i’ est foq muchii par en’ espèce ed’ multilinguisme qui arringe foq les tros langues les pus fortes. A cause ed’ cha, in risque d’aller à en’ dominatiëon d’en’ langue, et au bout du compte à foq en’ langue tout seu, chou qui mettrot gravmint in danger el’ diversité des langues et des cultures ed’ l’ Europe. Ch’est pou cha qu’ els’ espérantistes i’ défindtent l’idée d’en’ langue-pont parelle pou tertouss (mais pont unique tout seu) neutre qui rindrot possibe un respect égal ed’ tous les langues et en’ vraie utilité pou l’démocratie européenne.

Ch’est pou cha qu’in est in train d’arringii en’ manifestatiëon pou tout l’Europe, pou l’démocratie des langues in Europe. Chou qu’in veut inveuc cha, ch’est d’ faire parler de l’ manière el’ pus grande possibe (intr’aute pa les médias) ed’ l’affaire des langues in Europe, pou qu’ainsin les gins i’ sindtent bin qu’i’ a un problème...et à la fin peut-êt ermuer les responsabes politiques là-dssus. Pou y arriver, i’ faut qu’in soche assez d’monde et d’tous les couleurs pou arriver vraimint à en’ séquo. El’s’ espérantistes i’s’ sont otchupés ed’ chel’ manifestatiëon et tous les sociétés d’espéranto in Europe i’ s’arringerëont pou faire savoir tout cha dins leu régiëons et leu pays à euss.

El’ nom d’ chel’ manifestatiëon ch’est EUROPA BUNTO et cha veut dire "méli-mélo d’couleurs européen". Cha moute bin l’côté “fête” ed’ chel’ manifestatiëon ed’ tous les couleurs su l’diversité des langues.

Chel’ manifestatiëon al’ fra don vnir insonn :

• tous l’s’ associatiëons européennes d’espéranto ;
• tous l’s’ associatiëons qui s’otchuptent ed’ définde et d’ faire avinchii les langues et les cultures pou l'respect d’ el’ diversité des langues ;
• et tous ches gins qui s’ sindtent concernés et intéressés pa ch’ côté des langues in Europe.

Edu qu' ch'est : à Strasbourg (France) tout près du Parlemint Européen et du Consel ed’ l’Europe

Tchin qu' ch'est : Dimanche 9 mai 2004 (Journée d’ l’Europe)

Commint qu' ch'est : In met l’langue qu’in veut su les banderolles ; in met chou qu’in veut su ches banderolles (sins aller cont’ el’ declaratiëon des drots d’ l’homme et du citoyen européen)

Service d'informatiëon : Conférence ed’ presse inveuc représintatiëon parelle pou tous les langues ; service ed’ traductiëon pou tous les langues qui sront là

CHOU QU’ Y A DINS L’SITE

Prezento (présintatiëon) : pou moutrer chou qu’ ch’est  l’manifestatiëon et l’site, dins plusieurs langues européennes

Partneraj asocioj (associatiëons qui participent insonn) : liste ed’ tous l’s’associatiëons (in donnant leu site si n’d’a un) qui ont fait savoir leu participatiëon officielle à l’manifestatiëon

Kunveturado (pou faire el’ voyache insonn) : liste des propositiëons et des dmindes pou voyagii insonn pou aller a l’ manifestatiëon à Strasbourg

Sloganoj & materialo (slogans & matériels) : liste d’ el’s’ idées de slogans et d’banderolles pou l’manifestatiëon

Dissendolisto (liste ed’ diffusiëon) : liste ed’ discussiëon pou l’s’ organisateurs de l’manifestatiëon. Es’ langue principale pou ouvrer ch’est l’espéranto et in peut s’abonner à chel’ liste, in invoyant un messache sins rin n’dins à europa-2004-subscribe@yahoogroupes.fr

Kontakto (contact) : coordonnées pou poser des questiëons à l’s’ organisateurs (“organizantoj”), o bin au secrétaire responsabe d’el’ Manifesatiëon (“sekretario”), o bin pou invoyer ses idées (pou l’voyache, pou les slogans, etc...) o bin ses traductiëons à chti qui s’otchupe du site (“TTT-estro”)

Ligoj (loyens) : En’ paire ed’ loyens in rapport inveuc l’Europe et les langues

(tradukis pikarden de la Orchies-regiono : Claude Longue-Epée)